சென்னை பல்கலைக்கழக நூலகத்தில் நீண்ட காலமாக பாதுகாத்து வைக்கப்பட்டிருந்த கணித மேதை சீனிவாச ராமானுஜனின் கையெழுத்துப்படிகள் முதலமைச்சர் அவர்கள் வழிகாட்டுதலின் படி மின் பதிப்பகம் செய்யப்பட்டு தமிழ் மின் நூலகத்தில் பதிவேற்றம் செய்யப்பட்டுள்ளன (http://tamildigitallibrary.in) என்று தகவல் தொழில்நுட்பவியல் மற்றும் டிஜிட்டல் சேவைகள் துறை அமைச்சர் முனைவர் பழனிவேல் தியாகராஜன் தெரிவித்துள்ளார்.

சீனிவாச இராமானுஜனின் கையெழுத்துப் படிகள், மூன்று தொகுதிகளில் ஏறத்தாழ 700 பக்கங்களாக இதில் இடம்பெற்றுள்ளன. சென்னை ஐஐடி நிறுவனத்தின் கணிதத்துறை பேராசிரியர் இராகேஷ் கண்ணா, எழுத்து படிகளை பார்வையிட்டு இப்படிகளுக்கென அறிமுக குறிப்பை எழுதியுள்ளார்.

தமிழ் இணைய கல்வி கழகத்தை முத்தமிழறிஞர் கலைஞர் 2001 பிப்ரவரி 17 அன்று தொடங்கி வைத்தார். அதன் கீழ் செயல்படும் தமிழ் மின் நூலகம் 2017 அக்டோபர் 11 அன்று பயன்பாட்டிற்கு வந்தது. கலை, இலக்கியம், அறிவியல், வரலாறு, மருத்துவம் உள்ளிட்ட பல்வேறு துறைகளைச் சார்ந்த அரும்பெரும் நூல்களும்,                                பருவ இதழ்களும்,ஓலைச்சுவடிகளும் தமிழ் மின் நூலகத்தில் பதிவேற்ற பட்டுள்ளன.

ஒரு இலட்சத்திற்கும் மேற்பட்ட நூல்கள், பருவ வெளியீடுகள், 8 லட்சத்திற்கும் மேற்பட்ட ஓலைச்சுவடி பக்கங்கள் இதுவரை மின் பதிப்பகம் செய்யப்பெற்றுள்ளன. இம்மின் நூலகம் 17 கோடிக்கும் மேற்பட்ட பார்வையாளர்களை பெற்றுள்ளது.

அண்மையில் தகவல் தொழில்நுட்பரீதியாக மேம்படுத்தப்பட்டுள்ள தமிழ் மின் நூலக உள்ளடக்கங்களில் ஒளிப்படங்கள், ஒலித் தொகுப்புகள், காணொளிகள்,                     நிலவரைபடங்கள், தொல்லியல் தொடர்பான தகவல்கள் ஆகியவையும் புதிதாக பதிவேற்றம் செய்யப்பட்டுள்ளன. ஒரு பல்லூடக பயன்பாட்டு பெட்டகமாக மின்நூலகம்  உருமாற்றப்பட்டுள்ளது. தமிழ் பிராமி வட்டெழுத்து, கிரந்தம் மற்றும் பிற மொழிகளில் உள்ள கல்வெட்டுகள் பற்றிய தகவல்கள் இடம்பெற்றுள்ளன.

மின் நூலகத்தில் உள்ளடக்கங்கள் தொடர்ந்து புதுப்பிக்கப்பட்டு வருகின்றன. அரிய நூல்கள், ஆவணங்கள் தொடர்ந்து சேகரிக்கப்பட்டு எழுத்தாளர் விபரம் உள்ளிட்ட குறிப்புகளுடன் பதிவேற்றம் செய்யப்பட்டு வருகின்றன. தமிழ்நாடு அரசின் அருங்காட்சியகத்தில் பாதுகாக்கப்பட்டு வந்த மகாகவி பாரதியாரின் கையெழுத்து பிரதிகள் செப்டம்பர் 11 அன்று அவரது நினைவு நாளை ஒட்டி மின் பதிப்பகம் செய்யப்பட்டுள்ளன.

அந்த வகையில் தற்போது கணித மேதை சீனிவாச இராமானுஜனின் கையெழுத்துப் பிரதிகள் (Hypergeom , etric series, continued fractions, master theorem for the evaluation of integrals, etc.,)மின்னுலகத்தில் ஒரு தனித்தொகுப்பாகப் சொல் பதிவேற்றம் பெற்றுள்ளன.

சீனிவாசன் இராமானுஜனின் கையெழுத்து பிரதிகள் மின் பதிப்பகம் செய்யப்பெற்று பதிவேற்றம் பெறுவதில் பங்கு வகித்த ஆய்வாளர்களுக்கும், அலுவலர்களுக்கும் தகவல் தொழில்நுட்பவியல் மற்றும் டிஜிட்டல் சேவைகள் துறை அமைச்சர் வாழ்த்துக்களையும், பாராட்டுக்களையும் தெரிவித்துள்ளார்.

Media: Murasoli